Birinchi mototsikl — bu eng chiroyli yoki eng kuchli moto emas. Bu siz bilan birga o'sadigan, xato qilishga joy qoldiradigan va sizni yo'ldan bezdirmaydigan mashina. Quyida biz kursda eng ko'p beriladigan savollarga qisqa javob berdik.
Kubatura: kattaroq degani yaxshiroq degani emas
Boshlovchilar uchun 250–400 sm³ oralig'i deyarli har doim to'g'ri tanlov. Bunday motolar yetarlicha tezkor, lekin gaz ruchkasidagi kichik xato sizni yo'ldan chiqarib yubormaydi. 600 sm³ va undan yuqorisi birinchi yil uchun ortiqcha — nazoratni o'rganishdan ko'ra qo'rquvni yengishga vaqt ketadi.
Og'irlik va o'tirish balandligi
Motoni turg'un holatda ko'tara olishingiz va svetoforda ikkala oyoq uchi bilan yerga yeta olishingiz kerak. Salonda o'tirib ko'ring: agar moto sizdan og'ir bo'lsa, past tezlikdagi har bir manyovr stressga aylanadi.
- Quruq og'irlik 180 kg dan oshmasin
- Ikkala oyoq yerga tegsin — hech bo'lmasa uchlari bilan
- Ruli va tormoz ruchkasi qo'lingizga qulay tushsin
- ABS bo'lsa — bu birinchi moto uchun eng foydali qo'shimcha
Yangi yoki ishlatilgan?
Birinchi motoni ishlatilgan holda olish mantiqan to'g'ri: birinchi yilda kichik yiqilishlar bo'lishi mumkin va yangi motoning plastikasini almashtirish qimmatga tushadi. Ishlatilgan moto olayotganda ramka, vilka va zanjirni albatta tekshiring — buni yolg'iz qilmang.
Kursda ko'p eshitadigan gapimiz: birinchi motoni sotib olishga shoshilmang. Avval haydashni o'rganing — nima kerakligini o'zingiz tushunasiz.
Byudjetni to'liq hisoblang
Motoning narxi — xarajatning bir qismi. Ekipirovka, sug'urta, texnik xizmat va rezina uchun alohida summa ajrating. Ko'p yangi haydovchilar butun byudjetni motoga sarflab, kaskaga pul qoldirmaydi — bu eng qimmat xato.